細個嘅時候，每逢聖誕最期待嘅節目就係同老豆落屋企樓下搭巴士去尖沙咀，如果咁啱上到果架係熱狗（即係無冷氣嘅巴士）就更開心，因為無窗，所以風景睇得好清楚同埋可以聽到巴士外嘅聲音。巴士一進入彌敦道，就會見到馬路旁同中間掛滿聖誕燈飾，亦都只有喺果個時候先會希望塞車，所以喺細個時，腦海記憶裡面，由旺角到尖沙咀呢段路，係全世界最有聖誕氣氛嘅地方。呢個最便宜嘅慶祝方式，亦都成為我長大成人後最珍貴嘅回憶。
人總不能只在懷舊，但偶爾拎翻啲美好嘅回憶出嚟回味吓，多多少少可以幫今天嘅自己打吓氣，因為即使曾經給予你幸福嘅人已經不在身旁，但你仍然可以憧憬自己成為給予別人幸福的人。
我從來都唔會佈置聖誕，但今年決定要用吓心機去令自己同朋友可以一齊感受吓聖誕嘅氣氛。
祝大家有一個快樂得便宜嘅聖誕節。
Search